អ្នកជំនាញ​សេដ្ឋកិច្ច​អះអាង​ថា រដ្ឋាភិបាល​លោក ហ៊ុន ម៉ាណែត នឹង​ជួប​វិបត្តិ​សេដ្ឋកិច្ច​កាន់តែ​យ៉ាប់​នៅ​ឆ្នាំ​២០២៤

ចែករំលែក ៖​

២២ ធ្នូ ២០២៣ / 22 December 2023

អ្នកជំនាញ​សេដ្ឋកិច្ច​វាយតម្លៃ​ថា រដ្ឋាភិបាល​របស់​លោក ហ៊ុន ម៉ាណែត នឹង​ជួប​វិបត្តិ​សេដ្ឋកិច្ច​កាន់តែ​យ៉ាប់​នៅ​ឆ្នាំ​២០២៤​ខាងមុខ​។ ពួកគេ​លើកឡើង​ថា លោក ហ៊ុន ម៉ាណែត ដឹកនាំ​ប្រទេស​មិន​ខុស​ពី​ឪពុក​របស់​លោក​នោះ​ទេ បញ្ហា​នេះ​នឹង​ធ្វើ​ឲ្យ​ពលរដ្ឋ​កាន់តែ​រង​ទុក្ខ​លំបាក។

អ្នកជំនាញ​សេដ្ឋកិច្ច​ព្យាករណ៍​ថា រដ្ឋាភិបាល​របស់​លោក ហ៊ុន ម៉ាណែត នឹង​មិន​អាច​ស្ដារ​សេដ្ឋកិច្ច​ឲ្យ​រីកចម្រើន​ធ្វើ​ឲ្យ​ប្រជាពលរដ្ឋ​រស់នៅ​សុខ​សប្បាយ​ដូច​ដែល​ក្រុម​បក្ខពួក​គ្រួសារ​ត្រកូល​ហ៊ុន​រស់នៅ​សប្បាយ​លើ​ទ្រព្យសម្បត្តិ​មហាសាល នោះ​ឡើយ។

អតីតរដ្ឋមន្ត្រី​ក្រសួង​សេដ្ឋកិច្ច និង​ហិរញ្ញវត្ថុ លោក សម រង្ស៊ី មាន​ប្រសាសន៍​ថា លោក ហ៊ុន ម៉ាណែត គ្រាន់តែ​ជា​នាយករដ្ឋមន្ត្រី​ទីងមោង​តែប៉ុណ្ណោះ​។ លោក​អះអាង​ថា លោក ហ៊ុន សែន នៅតែ​ជា​អ្នក​កាច់ចង្កូត​ដឹកនាំ​ប្រទេស​ដដែល​។ លោក សម រង្ស៊ី បន្ថែម​ថា ដោយសារតែ​លោក ហ៊ុន សែន នៅ​តែ​មាន​ឥទ្ធិពល​លើ​ការដឹកនាំ​នេះ​ហើយ ទើប​ធ្វើ​ឲ្យ​ការដឹកនាំ​របស់​លោក ហ៊ុន ម៉ាណែត គ្មានអ្វី​ផ្លាស់ប្ដូរ ឬ​រីក​ចំរើន​នោះ។

លោក សម រង្ស៊ី៖ «ឪ​គាត់​ធ្វើ​ទាំង​ប៉ុន្មាន គាត់​បន្ត​ធ្វើ​អាក្រក់​លើស​ឱ​ទៅទៀត​។ មានតែ​ធ្វើ​អាក្រក់​បន្ត​ទៀត​ដើម្បី​បង្ហាញ​ថា គាត់​ស្មោះត្រង់​ជាមួយ​ឪ​គាត់​។ លោក ហ៊ុន ម៉ាណែត គាត់​ធ្វើជា​នាយករដ្ឋមន្ត្រី​ទីងមោង តែ​លោក ហ៊ុន សែន នៅ​កាន់​អំណាច​ពេញដៃ​ដដែល​ទេ»។

រដ្ឋាភិបាល​ដឹកនាំ​ដោយ​លោក ហ៊ុន ម៉ាណែត ដើរ​លើ​គន្លង​ឪពុក​របស់​លោក គឺ​លោក ហ៊ុន សែន ដដែល។ លោក​បាន​ចាប់​យក​ចិន​ជា​ឆ្អឹង​ខ្នង​បង្អែក​សេដ្ឋកិច្ច ទោះបីជា លោក​ធ្លាប់​អះអាង​ថា លោក​ដឹកនាំ​ប្រទេស​មិន​ងាក​ទៅ​ប្រទេស​ណាមួយ​ខ្លាំង​ក៏​ដោយ។ បញ្ហា​នេះ​ក៏​ជា​កត្តា​ចម្បង​ដែល​ធ្វើ​ឲ្យ​កម្ពុជា​ក្រោម​ការដឹកនាំ​របស់​ត្រកូល​ហ៊ុន​នេះ រង​សម្ពាធ​សេដ្ឋកិច្ច ពី​ប្រទេស​លោក​សេរី​ដូចជា​ការ​បាត់បង់​ប្រព័ន្ធ​អនុគ្រោះ​ពន្ធ EBA ពី​សហភាព​អឺរ៉ុប និង GSP របស់​អាមេរិក​ជាដើម។

លើស​ពី​នេះ​ទៀត ក្នុង​រយៈពេល​ប៉ុន្មាន​ឆ្នាំ​ចុង​ក្រោយនេះ​កម្ពុជា​ក៏​បាត់បង់​អ្នក​វិនិយោគ ពី​ប្រទេស​លោក​សេរី​ច្រើន​ដែរ។ អ្នក​វិនិយោគ​ដែល​ចូល​មក​កម្ពុជា​នោះ​គឺ​វិនិយោគិន​ចិន ដែល​មក​វិនិយោគ​លើ​វិស័យ​អចលនទ្រព្យ​។ វិស័យ​នេះ កំពុងតែ​ជាប់​គាំង​នា​ពេល​បច្ចុប្បន្ន​នេះ។ ជាក់ស្ដែង​នៅ​ក្រុងព្រះសីហនុ គឹ​ត្រូវ​បាន​គេ ប្រសិទ្ធិនាម​ថា ជាទី​ក្រុង​ខ្មោច ឬ​អគារ​ខ្មោច​ជាដើម។

ទោះបីជា​បែបនេះ​ក្ដី​ក្រសួង​សេដ្ឋកិច្ច និង​ហិរញ្ញវត្ថុ​បាន​ចេញ​របាយការណ៍​ព្យាករណ៍​ថា សេដ្ឋកិច្ច​កម្ពុជា​នៅ​ឆ្នាំ​២០២៤​ខាងមុខ នឹង​កើនឡើង​៦.៦% ខណៈ​ដែល​ឆ្នាំ​២០២៣ កំណើនសេដ្ឋកិច្ច​៥.៥%​។ ក្រសួង​អះអាង​ថា វិស័យ​ដែល​ជួយ​ជំរុញ​កំណើនសេដ្ឋកិច្ច​នោះ មាន​វិស័យ​ឧស្សាហកម្ម​កាត់ដេរ​ទេសចរណ៍ និង​កសិកម្ម​ជាដើម។

ទោះបី​ក្រសួង​សេដ្ឋកិច្ច​អះអាង​បែប​នេះ​ក្តី លោក សម រង្ស៊ី លើក​ឡើង​ថា រដ្ឋាភិបាល​របស់​លោក ហ៊ុន ម៉ាណែត នេះ​ពិបាក​រំពឹង​ថា នឹង​អាច​ស្ដារ​សេដ្ឋកិច្ច​ឲ្យ​រីកចម្រើន បាន​នៅ​ឆ្នាំ​២០២៤​ដោយសារតែ​រដ្ឋាភិបាល​មិន​ទាន់​មាន​ទំនាក់ទំនង​ល្អ​ឡើងវិញ ជាមួយ​សហរដ្ឋ​អាមេរិក និង​អឺរ៉ុប។

លោក​បន្ថែម​ថា កន្លង​មក​កម្ពុជា​ដែល​ទទួល​បាន​អ្នក​វិនិយោគ​នោះ គឺ​ភាគច្រើន​ជា​វិនិយោគិន​ចិន​ដែល​មក​វិនិយោគ​លើ​វិស័យ​អចលនទ្រព្យ តែ​វិស័យ​នេះ​កំពុងតែ​ជាប់​គាំង។ លោក​ថា បញ្ហា​នេះ​អ្នក​ដែល​រង​ផល​ប៉ះពាល់​ខ្លាំង​ជាងគេ​គឺ​ប្រជាពលរដ្ឋ។

លោក សម រង្ស៊ី៖ «តួលេខ​ផ្លូវ​ការដែល​គេ​យក​មក​មក​បង្ហាញ​ដែល​វា​ខុសស្រឡះ​ពី​ការ​ពិត។ ឥលូវ​ការពិត​យើង​ត្រូវ​មើល​ពី​ជីវភាព​របស់​ប្រជាពលរដ្ឋ​រស់នៅ​ប្រចាំថ្ងៃ​ខ្ញុំ​មិន​ចង់​និយាយ​ពី​ក្រុម​បក្ខពួក​ក្រុម​មហាសេដ្ឋី​ក្រុម​គ្រួសារ ហ៊ុន សែន ទេ ពួក​ហ្នឹង​គេ​មាន​ស្ដុកស្ដម្ភ​ចង់​មិន​និយាយ​ពួក​ហ្នឹង​ទេ តែ​ប្រជាពលរដ្ឋ​ប្រមាណ​៩០%​ក្រីក្រ​រស់​នៅ​លំបាក»។

ធនាគារពិភពលោក (World Bank) បាន​ចេញ​របាយការណ៍ កាល​ពី​ដើម​ឆ្នាំ​២០២៣​ថា គិត​ត្រឹម​ឆ្នាំ​២០២០​សេដ្ឋកិច្ច​កម្ពុជា​បាន​ធ្លាក់ចុះ​ធ្វើ​ឱ្យ​ពលរដ្ឋ​ខ្មែរ​ជាង ១​លាន ២​សែន (១,២) នាក់​រស់នៅ​ក្រោម​បន្ទាត់​ភាព​ក្រីក្រ ឬ​មានន័យថា​មនុស្ស​ម្នាក់​រកចំណូល​បាន​តិច​ជាង ២,៧​ដុល្លារ ឬ​ប្រមាណ​មួយ​ម៉ឺន​រៀល​ក្នុង​មួយថ្ងៃ ខណៈ​ដែល​ពលរដ្ឋ​ខ្មែរ​ចំនួន​ពាក់កណ្ដាល​ប្រទេស​ផ្សេងទៀត​ចំណាយ​ត្រឹមតែ​៤,១៥​ដុល្លារ ឬ​ប្រមាណ​១​ម៉ឺន ៦​ពាន់​រៀល ឬ​តិច​ជាង​នេះ​ក្នុង​មួយ​ថ្ងៃ។

អ្វី​ដែល​ធ្វើ​ឲ្យ​កាន់តែ​ធ្ងន់ធ្ងរ​ថែមទៀត​នោះ កម្ពុជា​ដកដង្ហើម​សេដ្ឋកិច្ច​ពឹង​លើ​ប្រទេស​ចិន​ជា​កត្តា​ចម្បង​ក៏ប៉ុន្តែ​ប្រទេស​ចិន​សព្វថ្ងៃ​នេះ​កំពុងតែ​ជួប​វិបត្តិ​សេដ្ឋកិច្ច​ធ្ងន់ធ្ងរ។ នៅ​ស្រប​ពេល​ប្រទេស​មួយ​ចំនួន​លើ​ពិភពលោក​កំពុងតែ​ជួប​ឧបសគ្គ​រឿង​ទំនិញ​ឡើងថ្លៃ ឬ​អតិផរណា​(Inflation) តែ​ប្រទេស​ចិន​ជួប​រឿង​ផ្ទុយ​ពី​នេះ​ទៅវិញ។ រយៈពេល​ប៉ុន្មាន​ខែ​ចុង​ក្រោយនេះ​ចិន​កំពុង​តែ​មាន​វិបត្តិ​បរិត្តផរណា (Deflation) ពោល​ទំនិញ និង​ថ្លៃ​សេវា​ចុះថោក​កាន់តែ​ខ្លាំង​ធ្វើ​ឲ្យ​មនុស្ស​លែង​ចាយ​លុយ និង​គ្មាន​ការងារ​ធ្វើ។

អ្នកជំនាញ​សេដ្ឋកិច្ច​បាន​ពន្យល់​ថា ប្រទេស​ដែល​មាន​អតិផរណា (Inflation) ទំនិញ​ឡើងថ្លៃ ឬ​មាន​បរិត្តផរណា ទំនិញ​ចុះថ្លៃ​កាន់តែ​ខ្លាំង​នោះ មានន័យ​ថា ប្រទេស​នោះ​កំពុង​តែ​មាន​វិបត្តិ​សេដ្ឋកិច្ច​ធ្ងន់ធ្ងរ​។ ពួកគេ​ថា ផល​ប៉ះពាល់​សេដ្ឋកិច្ច​នៅ​ប្រទេស​ចិន​នេះ នឹង​សាយភាយ​ដល់​កម្ពុជា​មុនគេ​ដោយសារតែ​កម្ពុជា​ជា​កូនអុក​សេដ្ឋកិច្ច​របស់​ចិន​ស្រាប់​ទៅ​ហើយ។

អ្នកឃ្លាំមើល​ផ្នែក​អភិវឌ្ឍន៍​សង្គម​លោក​បណ្ឌិត សេង សារី មាន​ប្រសាសន៍​ថា ដោយសារតែ​រដ្ឋាភិបាល​ដឹកនាំ​ដោយ​ឪពុក និង​កូន ឬ​លោក ហ៊ុន ម៉ាណែត ដឹកនាំ​ងាក​ទៅ​រក​ចិន​នេះ​នឹង​ធ្វើ​ឲ្យ​រដ្ឋាភិបាល​ទាល់ច្រក​កាន់តែ​ខ្លាំង នៅ​ឆ្នាំ​២០២៤​នេះ។ លោក​បន្ថែម​ថា វិស័យ​ដែល​ជា​ឆ្អឹងខ្នង​សេដ្ឋកិច្ច​របស់​កម្ពុជា​ដ៏​សំខាន់ បាន​រង​ប៉ះពាល់​រួច​ទៅ​ហើយ ដោយសារតែ​រដ្ឋាភិបាល​ផ្ដេកផ្ដួល​ទៅ​ចិន ដូចជា​វិស័យ វាយនភ័ណ្ឌ​កាត់ដេរ វិស័យ​ទេសចរណ៍ និង​វិស័យ​កសិកម្ម។

បណ្ឌិត សេង សារី៖ «ទេសចរណ៍​ជនជាតិ​ចិន​ល្អៗ​ហ្នឹង​ក៏​មិន​មក​កម្ពុជា​ដែរ​ដោយសារតែ​រឿង​អសន្តិសុខ​ការ​ចាប់​ជំរិត ជួញដូរ​មនុស្ស​ដូច​ការ​ផ្សព្វផ្សាយ​រឿង No More Bets ។ រឿង​ទី​២ បញ្ហា​ការ មិន​គោរព​សិទ្ធិមនុស្ស និង​មិន​គោរព​ប្រជាធិបតេយ្យ និង​នីតិរដ្ឋ។ ខាង​វិស័យ​វាយនភ័ណ្ឌ ដែល​បាត់បង់​EBA​នេះ រដ្ឋាភិបាល​របស់ លោក ហ៊ុន ម៉ាណែត មិន​ទាន់​មាន​វិធានការ​ឆ្លើយតប​ទៅ​សហភាព​អឺរ៉ុប​យ៉ាងណា​នៅ​ឡើយ​ទេ និង​រឿង​ចុងក្រោយ​គឺ​វិស័យ​អចលនទ្រព្យ​នៅ​ជាប់​គាំង​នៅឡើយ ហើយ​វិស័យ​នេះ​ប្រៀប​ដូច​រឿង​ពពុះ​សាប៊ូ​អីចឹង»។

វិស័យ​ទេសចរណ៍​កាលពី​ឆ្នាំ​២០១៧ ត្រូវ​បាន​ធនាគារពិភពលោក ប៉ាន់​ស្មាន​ថា តំណាង​ឱ្យ ១​ភាគ ៣ នៃ​ផលិតផល​ក្នុង​ស្រុក​សរុប (ផ.ស.ស) របស់​កម្ពុជា​បាន​ធ្លាក់ ចុះ​៣៣% ក្នុង​ត្រីមាស​ទី​១ នៃ​ឆ្នាំ​២០២៣​នេះ បើ​ធៀប​នឹង​រយៈពេល​ដូចគ្នា កាល​ពី​ឆ្នាំ​២០១៩។ វិស័យ​កាត់ដេរ​ដែល​កាល​ពី​ឆ្នាំ​២០២២ មាន​មនុស្ស ៧​សែន ៥​ម៉ឺន​នាក់​បម្រើ​ការងារ និង​តំណាង​ឱ្យ ១ ភាគ​៣ ផ្សេង​ទៀត​នៃ​ផលិតផល​ក្នុង​ស្រុក​សរុប​របស់​កម្ពុជា ក៏​កំពុង​តែ​ប្រឈម​នឹង​ការ​លំបាក​ដូចគ្នា​ក្នុង​នោះ​កម្មករ​កាត់ដេរ ៥​ម៉ឺន​នាក់ បាន​បាត់បង់​ការងារ​ធ្វើ​កាល​ពី​ខែ​មីនា ឆ្នាំ​២០២៣។

ស្ថាបនិក​អង្គការ​មាតា​ធម្មជាតិ និង​ជា​អ្នកឃ្លាំមើល​ពី​ស្ថានការណ៍​នយោបាយ​លោក អាឡិច លើកឡើង​ថា រដ្ឋបាល​ដឹកនាំ​របស់​លោក ហ៊ុន ម៉ាណែត ងាក​ចេញ​ពី​ប្រទេស​លោក​សេរី គួប​ផ្សំ​និង​មន្ត្រី​ប្រព្រឹត្តិ​អំពើពុករលួយ​ចាក់គ្រឹះ​យ៉ាង​ខ្លាំង នៅ​ក្នុង​សង្គម​នេះ​នឹង​ធ្វើ​ឲ្យ​កម្ពុជា​នឹង​មាន​វិបត្តិ​ដូច​នៅ​ប្រទេស​ស្រីលង្កា (Sri Lanka) ដូច្នោះ​ដែរ។

គណបក្ស​ប្រជាជន​កម្ពុជា​កំពុង​តែ​មាន​ក្ដី​សង្ឃឹម​ថា ថ្ងៃ​ណាមួយ​សេដ្ឋកិច្ច​ក្ស័យធន​ចិន​មក​ជួយ​កុំ​សង្ឃឹម​ឲ្យ​សោះ កន្លង​មក​មិនមែន​អីចឹង​ទេ ប្រទេស​មួយចំនួន​ដែល​មាន​បញ្ហា​ចិន​មិន​អាច​ជួយ​បាន​ទេ ដូចជា​ប្រទេស​ស្រីលង្កា​ជាដើម​។ អ្វី​ដែល​ចិន​ធ្វើ​នោះ គឺ​ឆក់​យក​ធនធាន​​ធម្មជាតិ​ឆក់​យក​រ៉ែ ព្រៃឈើ និង​ធនធាន​រ៉ែ​ជាដើម។

មេដឹកនាំ​ផ្ដាច់ការ និង​បក្ខពួក​របស់​រដ្ឋាភិបាល​ស្រីលង្កា (Sri Lanka) មិន​ខុស​ពី​កម្ពុជា​ឡើយ។រដ្ឋាភិបាល​នៃ​ប្រទេស​នេះ បង្កើត​បក្ខពួក​និង​ប្រព្រឹត្តិ​អំពើពុករលួយ​ចាក់​ស្រេះ​នៅក្នុង​សង្គម។ រដ្ឋាភិបាល​ប្រទេស​នេះ បាន​ជំពាក់​បំណុល​បរទេស​កាន់​តែ​ច្រើន ពិសេស​ជំពាក់​ចិន​មិន​ខុស​ពី​កម្ពុជា​ឡើយ។

ដោយសារតែ​ប្រទេស​នេះ​ជំពាក់​បំណុល​ចិន គឺ​ចិន​រឹបអូស​យក​កំពង់ផែ ហាមបានតូតា (Hambantota) ដែល​កំពង់ផែ​នេះ​បាន​ខ្ចីប្រាក់​ពី​ចិន​ចំនួន ១.២០០​លាន​ដុល្លារ និង​កម្ចី​ចិន​ជាង​៣៥​ពាន់​ដុល្លារ​ផ្សេង​ទៀត។ នៅ​ទីបំផុត​ទៅ​ប្រជាពលរដ្ឋ​ស្រីលង្កា​បាន​ធ្វើ​បាតុកម្ម​បណ្ដេញ​មេដឹកនាំ​ចេញពី​អំណាច​កាល​ពី​ឆ្នាំ​២០២២។

រីឯ​កម្ពុជា​វិញ ការ​អភិវឌ្ឍ​ប្រទេស​ក៏​រដ្ឋាភិបាល​ពឹង​លើ​កម្ចី និង​ជំនួយ​របស់​ចិន​ដែរ។

មក​ទល់​ពេល​នេះ កម្ពុជា​បាន​ជំពាក់​បំណុល​បរទេស​ប្រមាណ ១០​ពាន់​លាន​ដុល្លារ​ហើយ​ក្នុង​ចំណោម​បំណុល​ទាំង​នេះ​ប្រមាណ ៤០% កម្ពុជា​ជំពាក់​បំណុល​ចិន។

ក្រុម​អ្នកជំនាញ​សេដ្ឋកិច្ច​លើកឡើង​ថា បើសិន​ជា រដ្ឋាភិបាល​របស់​លោក ហ៊ុន ម៉ាណែត នៅ​តែ​ងប់ងុល​ពឹង​លើ​សេដ្ឋកិច្ច​របស់​ចិន​តែមួយ​នោះ សេដ្ឋកិច្ច​កម្ពុជា​នៅ​ឆ្នាំ​២០២៤ ងើប​មិន​រួច​នឹង​កាន់​តែ​យ៉ាប់យ៉ឺន៕

អានលើគេហទំព័រ៖ http://www.rfa.org/.../hun-manet-government-may-face...

រូប៖ RFA និង ហ្វេសប៊ុក លោក ហ៊ុន ម៉ាណែត

ព័ត៌មានថ្មីបំផុត
Navalny’s Death Highlights the Dangers Facing Cambodia’s Political Prisoners
បទសម្ភាសន៍លោក សម រង្ស៊ី ជាមួយវិទ្យុអាស៊ីសេរី ថ្ងៃ ២៧ កុម្ភៈ ២០២៤ នេះ / Sam Rainsy's today's interview with Radio Free Asia on the results of the Senate election last Sunday.
ខួបទី ២៧ នៃថ្ងៃបង្កើតសហភាពអ្នកប្រជាធិបតេយ្យខ្មែរ នៅថ្ងៃ ២៧ កុម្ភៈ ឆ្នាំ ១៩៩៧ រវាងព្រះអង្គម្ចាស់ នរោត្តម រណឫទ្ធិ ប្រធានគណបក្សហ្វុនស៊ីនប៉ិច , សម្តេច សឺន សាន ប្រធានគណបក្សប្រជាធិបតេយ្យសេរីនិយមព្រះពុទ្ធសាសនា និងលោក សម រង្ស៊ី ប្រធានគណបក្សជាតិខ្មែរ (ដែលនឹងក្លាយទៅជាគណបក្ស សម រង្ស៊ី ក្នុងឆ្នាំ ១៩៩៨) / Union of Cambodian Democrats (*)
គ្មាននរណាអាចកម្ចាត់កម្លាំងប្រជាធិបតេយ្យខ្មែរបានទេ / Nobody can eliminate the Cambodian democratic forces
ត្រកូល ហ៊ុន កំពុងតែស្រវឹងអំណាច ដែលពួកគេបានប្លន់ពីប្រជារាស្រ្តខ្មែរ / The Hun's family are drunk on the power they have usurped from the Cambodian people.
Flag Counter