SAM Rainsyសហស្ថាបនិកគណបក្សសង្គ្រោះជាតិ

ប្រព័ន្ធសុខាភិបាល នៅប្រទេសបារាំង និង នៅប្រទេសកម្ពុជា

ចែករំលែក ៖​

០២ សីហា ២០២២ / 02 August 2022

ខ្ញុំចង់បានប្រព័ន្ធសុខាភិបាលមួយ សម្រាប់ប្រទេសកម្ពុជា ដូចប្រព័ន្ធសុខាភិបាល នៅប្រទេសបារាំង ដែលមានការបម្រើដោយយកចិត្តទុកដាក់ ចំពោះប្រជាពលរដ្ឋសាមញគ្រប់រូប នៅស្រុកគេ ក្នុងវិស័យសុខភាព។

ថ្ងៃនេះ ខ្ញុំបានទៅឲ្យគ្រូពេទ្យ នៅទីក្រុងប៉ារីស ពិនិត្យដំបៅមួយនៅជើងខាងឆ្វេង ដែលបានក្លាយ ហើយចាប់ផ្តើមហើម និងធ្វើឲ្យមានការចុកចាប់។ គ្រូពេទ្យបានធ្វើការវះកាត់បន្តិច ហើយបានផ្តល់វេជ្ជបញ្ជា ឲ្យលេបថ្នាំសាស្ត្រ (Antibiotiques) ព្រមទាំងឲ្យលាបថ្នាំមួយយ៉ាងទៀតលើមុខដំបៅ រយៈពេល ៥ ថ្ងៃ។

ខ្ញុំអត់ចាំបាច់ចំណាយលុយ មួយរៀលទេ សម្រាប់អន្តរាគមន៍គ្រូពេទ្យ និងការទទួលថ្នាំពេទ្យពីឱសថស្ថាន។

បទពិសោធន៍របស់ខ្ញុំ ថ្ងៃនេះ ធ្វើឲ្យខ្ញុំនឹកដល់ប្រជាពលរដ្ឋខ្មែរជាច្រើននាក់ ទូទាំងប្រទេស ដែលគ្មានមធ្យោបាយទៅព្យាបាលជំងឺ ហើយត្រូវលក់ស្រែចំការ ឬខ្ចីលុយពីធនាគារ ដើម្បីព្យាបាលជំងឺ សម្រាប់ខ្លួនឯង ឬក្រុមគ្រួសារ។

អ្នកដឹកនាំនយោបាយ នៅប្រទេសកម្ពុជា មិនត្រូវចេះតែបែរទៅមើលអតីតកាល ហើយគិតតែប្រៀបធៀបជាមួយសម័យខ្មែរក្រហម ប៉ុល ពត នោះទេ តែត្រូវខិតខំមើលទៅមុខ ដើម្បីមានគំនិតរៀបចំប្រទេសយើង ឲ្យមានលក្ខណៈរុងរឿង និងសម្បូរសប្បាយ ដូចអរិយប្រទេស ក្នុងពិភពលោក។