២៤ ឧសភា ២០២៣ / 24 May 2023
ដោយគាត់ប្រើអំណាចផ្តាច់ការរបស់គាត់ លោក ហ៊ុន សែន ចាប់យកពលរដ្ឋខ្មែរម្នាក់ៗ ធ្វើជាចំណាប់ខ្មាំងរបស់គាត់ ដែលគាត់អាចធ្វើបាបតាមចិត្ត ហើយបង្ខិតបង្ខំតាមចិត្ត។
ជាពិសេស ពលរដ្ឋដែលគាំទ្រគណបក្សប្រឆាំង ពីព្រោះស្រលាញ់សេរីភាព និងយុត្តិធម៌ ត្រូវបានលោក ហ៊ុន សែន ចាប់ដាក់គុក ដែលជាហេតុធ្វើឲ្យមានការរងទុក្ខវេទនារហូតដល់ក្រុមគ្រួសារសាមីខ្លួន។
សាមីខ្លួនខ្លះមានបញ្ហាសុខភាព កាន់តែធ្ងន់ធ្ងរ ដោយសារតែ មិនមានសេរីភាព និងមិនមានមធ្យោបាយ ទៅព្យាបាលជំងឺឲ្យបានត្រឹមត្រូវ។
ហេតុនេះហើយ បានជាសាមីខ្លួនត្រូវបង្ខំចិត្ត ធ្វើលិខិតសុំទោសលោក ហ៊ុន សែន តាមតែអ្វីដែលជនផ្តាច់ការនេះ បង្ខំឲ្យធ្វើ បើសាមីខ្លួនចង់ឲ្យគេដោះលែងពីពន្ធនាគារ។
តែតាមគោលការណ៍ច្បាប់ អ្វីៗទាំងអស់ដែលធ្វើឡើងក្រោមការបង្ខិតបង្ខំ គ្មានតម្លៃអ្វីទេ ហើយមិនអាចយកជាការបានទេ នៅថ្ងៃក្រោយ។
យើងត្រូវយល់ចិត្តអ្នកដែលសរសេរលិខិតទៅ “សុំទោស” លោក ហ៊ុន សែន ពីព្រោះពួកគាត់ត្រូវការសេរីភាព ដើម្បីបន្តជីវិត ហើយដើម្បីត្រឡប់ទៅជួយទ្រទ្រង់ជីវភាព ក្រុមគ្រួសារ ដូចមុនវិញ។
នៅក្នុងក្រអៅបេះដូងរបស់អ្នកតស៊ូទាំងនោះ គឺមិនបោះបង់ឧត្តមគតិដើមរបស់ពួកគាត់ឡើយ ហើយពួកគាត់នៅតែស្មោះត្រង់ ចំពោះប្រទេសជាតិ និងប្រជារាស្ត្រជានិច្ច។
Khmer
English
French
